SWAK sa Pool A ang Philippine national women’s volleyball team sa 21st Asian Senior Women’s Volleyball Championship na gaganapin sa Clark sa Pampanga at Subic, Zambales.
Ka-grupo ng Pinay volleybelles sa Pool A ang ranked 5th Kazakhstan, 6th Chinese Taipei at unranked Uzbekistan.
Pasok sa Pool B ang kapwa podium finisher sa nakaraang dalawang edisyon ng Asian Championship na Thailand (2nd) at Korea (3rd). Kasama rin nila sa grupo ang Iran (7th) at Australia (9th).
Ginanap ang virtual draw para sa grouping ng teams sa mismong Asian Volleyball Confederation office sa Bangkok Biyernes ng gabi, o isang araw matapos aprubahan ng Inter-Agency Task Force for the Management of Emerging Infectious Diseases ang request ng Philippine National Volleyball Federation (PNVF) na mag-host sa Asian championships sa Clark, Pampanga at Subic.
Ngunit giit ng Philippine government, “subject to strict compliance with health and safety protocols” ang naturang torneo.
Pinasalamatan naman ni PNVF President Ramon “Tats” Suzara ang Malakanyang, IATF, Philippine Sports Commission at Bases Conversion Development Authority sa pagpayag na gawin sa Clark at Subic ang torneo na nakatakdang simulan sa Agosto 29. (ANN ENCARNACION)
151 
